Samgönguvika er evrópskt átak um bættar samgöngur í borgum og bæjum. Markmið vikunnar er að hvetja fólk til umhugsunar um eigin ferðavenjur og virkja það til að nota almenningssamgöngur, hjóla eða ganga. Einnig er vikunni ætlað að hvetja stjórnvöld til að stuðla að notkun þessara samgöngumáta og fjárfesta í nauðsynlegum aðbúnaði. Fleiri en 2.000 sveitarfélög taka þátt í Samgönguviku. Þema vikunnar í ár er Á réttri leið!

Í dag klukkan þrjú verður ný hjólaþrautabraut opnuð í Öskjuhlíð. Um er að ræða ,,pumpu-braut“ (,,Pump Track“) sem farin er með sérstakri tækni og notuð til þjálfunar og leikja. Félagar í hjólreiðafélaginu Tindi eiga heiðurinn af lagningu brautarinnar og hafa unnið hana í samvinnu við Reykjavíkurborg sem leggur til svæðið. Opnun brautarinnar er liður í dagskrá Samgönguviku sem nú stendur yfir. Brautin er staðsett við Nauthólsveg norðan við Háskólann í Reykjavík.

Fyrirmyndirnar að brautinni eru erlendar eins og nafnið Pump Track gefur til kynna, en útfærð af félögum í Tindi og hafa þeir veg og vanda að framkvæmd. Þeir hafa unnið hörðum höndum undanfarið við að móta brautina og þjappa undirlag.

Hjólreiðafélagið Tindur var stofnað í febrúar 2011 með það að markmiði að fjölga þátttakendum í keppnishjólreiðum á Íslandi, sem og þeim greinum sem stundaðar eru hvort heldur það eru samgönguhjólreiðar, keppnishjólreiðar eða bara hjólreiðar til skemmtunar, eins og segir á vef félagsins. Tindur er löglegt íþróttafélag innan ÍSÍ og stendur öllum opið til þátttöku.
______________

Nánari upplýsingar veitir Pálmi Freyr Randversson verkefnisstjóri hjá umhverfis- og skipulagssviði, sími 693 2947

Í frétt á vef Reykjavíkurborgar eru ljósmyndir sem teknar voru á sunnudag þegar félagar í Tindi unnu að lagningu brautarinnar >>> http://www.reykjavik.is/desktopdefault.aspx/tabid-757/521_read-33034/

Í tilefni af Samgönguvikunni í Mosfellsbæ hefur endurútgefið nýtt og uppfært hjóla- og göngustígakort sem sýnir samgöngu- og útivistarstíga í Mosfellsbæ og tengingu þeirra við stígakerfi annarra sveitarfélaga á höfuðborgarsvæðinu.
Kortið var síðast gefið út árið 2010 og kláraðist upplagið fljótt þótt kortið væri ennþá aðgengilegt á heimasíðu bæjarins.
Í tilefni Samgönguvikunnar verður kortinu dreift á helstu staði í bænum, svo sem á Bókasafn Mosfellsbæjar og íþróttamiðstöðvar bæjarins, ásamt því að liggja frammi í þjónustuveri Mosfellsbæjar.
Stígakortið er einnig aðgengilegt á vef Mosfellsbæjar.

Ráðstefnan Hjólum til framtíðar 2012 – rannsóknir og reynsla verður haldin í Iðnó eftir viku, föstudaginn 21. september kl. 9 – 16.  Til landsins koma virtir vísindamenn frá Bretlandi og Finnlandi með áhugaverða fyrirlestra. Einnig verða kynntar niðurstöður innlendra rannsókna sem og dregin fram reynsla einstaklinga, fyrirtækja og sveitarfélaga í að efla hjólreiðar.

Eitt lykilerinda ráðstefnunnar er um rannsókn á  hjólreiðum á norðurslóð, en hún sýnir að öflugasti hópur hjólreiðamanna í finnsku borginni Oulu er á aldrinum 15 – 25 árs og um 30% þeirra hjóla allt árið um kring í allt að -30°frosti. Á  Íslandi hefur þessi hópur verið lítt sýnilegur.

Katrín Jakobsdóttir menntamálaráðherra, Jón Gnarr borgarstjóri og Dr. Ari Kristinn Jónsson rektor HR munu ávarpa ráðstefnuna. Þorsteinn Hermannsson samgönguverkfræðingur er fundarstjóri.

Hjólafærni á Íslandi og Landssamtök hjólreiðamanna standa fyrir ráðstefnunni í góðri samvinnu við Reykjavíkurborg, Vegagerðina, Landlæknisembættið, Háskóla Íslands, Háskólann í Reykjavík, Ferðamálastofu og fleiri góða aðila. Ráðstefnan er hluti af dagskrá Evrópsku samgönguvikunnar.

Nánari upplýsingar um dagskrá er að finna á vef Hjólafærni og lýkur skráningu á miðnætti 19. sept. Aðgangur að ráðstefnunni er 4.500 kr. og 2.000 kr. fyrir námsmenn.
Sjá vef Hjólafærni á Íslandi – fræðasetur um hjólreiðar  >>>  http://hjolafaerni.is/

Nánari upplýsingar veitir Sesselja Traustadóttir, framkvæmdastýra Hjólafærni á Íslandi í s. 864 2776 hjolafaerni@hjolafaerni.is

Í tilefni af evrópskri samgönguviku dagana 16. – 22. september efnir Reykjavíkurborg til ljósmyndasamkeppni um visthæfar samgöngur undir fyrirsögninni; Á réttri leið – svona ferðast ég. Samkeppnin hefst í dag og lýkur á miðnætti þann 30. september.

Ljósmyndasamkeppni er á vegum höfuðborgarsvæðisins, og er að finna á fésbókarvef Samgönguviku: https://www.facebook.com/#!/samgonguvika og einnig á fésbókarsíðu Reykjavíkurborgar en þangað má senda inn myndir af hjólandi, gangandi og hlaupandi fólki, fólki í strætó og fólki á rafbílum svo eitthvað sé nefnt.

Í boði eru vegleg verðlaun; reiðhjól að verðmæti 76.000 kr. frá Erninum, strætókort og sundkort í sundlaugar Reykjavíkur.

Dómnefnd velur 3 bestu myndirnar en myndin sem flestum „Líkar við” fær sérstök verðlaun.

Svona ferðast ég.

Samgönguvikan hefst á sunnudag með hjóladegi fjölskyldunnar, sem haldinn er í samstarfi við Dag íslenskrar náttúru. Í vikunni verður boðið upp á viðburði s.s. Hjólað í skólann og þá verður ,,Pump track” braut opnuð með viðhöfn í Öskjuhlíð.

Í lok vikunnar, föstudaginn 21. september, verður boðið til málþings um hjólreiðar og vistvænar samgöngur en þar er sjónum beint að rannsóknum og reynslu þeirra sem unnið hafa að eflingu hjólreiða í sínu nærumhverfi. Hjólreiðar á köldum svæðum er eitt lykilerinda ráðstefnunnar.
Stæðaæði verður haldið í annað sinn á Íslandi, en það er árlegur alþjóðlegur viðburður (Park(ing)Day) þar sem almenningur, listafólk, hönnuðir og hagsmunasamtök prófa fjölbreytta notkunarmöguleika gjaldskyldra bílastæða einn dag á ári. Samgönguvikunni lýkur svo laugardaginn 22. september með ,,bíllausa deginum”.

Ljósmyndasamkeppnin ,,Á réttri leið – svona ferðast ég” hefst í Samgönguviku og eru allir hvattir til að taka myndir af sínum samgöngumáta og skila inn þegar samkeppninni verður hleypt af stokkunum.

Yfirskrift samgönguvikunnar að þessu sinni er ,,Á réttri leið”. Markmið vikunnar er að hvetja fólk til umhugsunar um eigin ferðavenjur og fjölga þeim sem nota almenningssamgöngur, hjóla eða ganga.

Reykjavík tekur þátt ásamt öðrum sveitarfélögum á höfuðborgarsvæðinu og fjölmörgum samstarfsaðilum.  Dagskrá fyrir Reykjavík er  að finna á vefsvæði Samgönguviku > www.reykjavik.is/samgonguvika

Dagskrá fyrir Mosfellsbæ er að finna á vefsvæði Samgönguviku > www.mos.is/samgonguvika

Dagskrá fyrir Hafnarfjoður er að finna á > http://www.hafnarfjordur.is/thjonusta/frettir/nr/2664

Dagskrá fyrir Akureyri er að finna á > http://www.akureyri.is/is/ibuagatt/frettir/evropsk-samgonguvika